طين التشكيل المعروف باسم “عجينة السيراميك” من الخامات الي بتدينا مساحة كبيرة من الإبداع كدة لأنها مش بتقيدنا لا بشكل ولا لون معين، ممكن نشكلها زي ما احنا عايزين و نطليها باي لون او شئ احنا عايزينه، الاحتمالات غير محدودة هنا من حلى وإكسسوارات لأدوات مكتبية لقصريات زرع لأنتيكات أي حاجة تخطر على بالنا
وزي اي خامة ليه انواع وخصائص كتير وده طبعا بيأثر على شكل المنتج النهائي اللي عايز تعمله يعني مثلا الطين اللي بتعمل منه فخار وبيتحط في افران خاصة غير اللي ممكن نعمل بيه اكسسوارات او طقطوقة صغيرة غير اللي ممكن نعمل منه أشكال مصغرة
البوست ده عشان يساعدك وانت لسة بتبدي تختار النوع المناسب للحاجة اللي عايز تعملها بدل ما الواحد يتعب نفسه في حاجة و تبوظ عشان خصائص الخامة بتاعته مش مناسبة ليها ويكون مش عارف ايه السبب و اصلا ده ممكن يحبطه انه يكمل في الطين في حين ان كل مشكلته مجرد معلومات لو عرفها خلصت المشكلة
حبيت اعمل البوست على شكل اسئلة واجابات لأني وانا بدور عموما في اي حاجة مش عارفاها دي بتكون اسهل طريقة تفهمني الليلة من غير ما أدور كتير
البوست بيتجدد كل فترة لو جاتلي اسئلة جديدة لوحد عنده سؤال ملقاش اجابته هنا يا ريت يكتبهولي في التعليقات
الأسئلة:
1. ايه هي عجينة السيراميك وليه اتسمت كدة؟
4. الون في اي مرحلة ونوع الالوان اللي استخدمها؟
5. ايه الي هيحصل لو حطيت الطين الي بيتصلب بالهوا في الفرن؟
6. ايه المدة اللي مفروض اسيب فيها طين البوليمر في الفرن؟
7. اعمل ايه لو الطين ناشف وصعب تشكيله؟
8. ايه الأدوات الي هحتاجها مع عجينة السيراميك؟
9. ازاي ممكن الزق شكلين في بعض؟
10. ازاي ممكن احافظ على عجينة السيراميك من انها تنشف او تكسر؟
الأسئلة بإجباتها:
1.ايه هي عجينة السيراميك و ليه اتسمت كدة؟
طيب هو زي الصورة اللي على اليمين ما بتقول عجينة السيراميك هي نوع من انواع طين التشكيل وليها نفس الخواص بس نقدر نعتبرها نوع معالج من طين الخزف اللي في النص طين الخزف هو الطين الي بيستخلص من الطبيعة اللي بيتكون من صخور مقتتة لجزيئات صغيرة بفعل العوامل الطبيعية وبيتعالج بطرق معينة ويتصفى و يتحط في بانيوهات مخصوصة عمله يعتبر صناعة اكتر منه حرفة منزلية
اهم خاصية فيه هي انه سهل تشكيله باي شكل يخطر على بالنا ونحته اللي هي بيسموها اللدونة و الخاصية دي مشتركة مع كل انواع طين التشكيل هي هي في الصلصال وفي عجينة السيراميك اه ممكن النعومة تختلف بس احنا بنتحكم فيها فيها الفرق الوحيد ان طين الخزف احيانا بيستخدم معاه الدولاب اللي بيلف ده اثناء تشكيله وده لأنه بيتعمل منه فازات و طواجن وحاجات لازم يكون اشكالها فيها سيمترية (سيمترية يعني مقاييس محددة مثلا لزم الدوران والعمق يبقي متساوي مع بعضه ومظبوط) اما عجينة السيراميك بتستخدم لحاجات اقل سيميترية تاني خاصية بئى هي التغير في الخامة والجزيئات مع التعرض لدرجات حرارة عالية في افران خاصة في حالة الخزف والجفاف بالهوا او في فرن البيت زي عجينة السيراميك ومش موجودة خالص في الصلصال والخاصية دي اللي اديتها اسم السيراميك لأن السيراميك هو التغير في جزيئات الطين لما يتعرض لدرجة حرارة عالية وفعلا السيراميك اللي بنشوفه في بيوتنا ده بيتصنع كدة في المحاجر من رمل الارض
طين البوليمر – polymer clay – oven baked clay
ده طين مصنع وملون زي الصلصال في منه الوان كتيرة وفي منه بجليتر والوان ميتاليك، الخاصية اللي بتميزه انه بعد ما تخلص تشكيل القطعة بتاعتك بتحطه في الفرن المنزلي عادي لفترة قليلة نسبيا على حسب سمك القطعة ويطلع بلاستيكي وناشف محتفظ بشكله والمية مبتبوظوش مناسب للاكسسوارات والاشكال المصغرة ممكن نلونه بالوان اكلريك او الوان ازاز
طين يتصلب بالهواء – air dry clay
ده اسهل انواع الطين في التعامل وفي التوافر كمان موجود كتير وبسعر رخيص وكمان ممكن يتعمل منزليا بسهولة وبمقادير موجودة في المطبخ، مش محتاج لفرن بس يتساب ينشف لمدة من يومين ل 3 ايام متوافر باللون الابيض او البيج و ممكن نلونه و نطليه بالوان اكلريك او ازاز او حتى الوان السبراي لكن هو مش مقاوم للمية اوي لأن وهو طري اصلا بنطريه بالمية و هو بيتصلب لما يبخر المية اللي فيه فطبيعي لو حطينا القطع بعد ما تنشف لمدة في المية هتدوب لكن ممكن نظليه بحاجات تزود مقاومته للمياة بس برضه حتى لما يتطلي ميستحبش يتساب في مية لمدة كبيرة وطبعا بالتبعية مينفعش نعمل منه مجات مثلا او قصرية زرع
بالنسبة للبوليمر بيكون مستورد اكتر الماركات اللي معروفة فيه هي بريمو و فيمو و سكالبي، في وصفات موجودة على النت لصناعته منزليا لكن مبيطلعش بنفس الكفاءة والفينيش وغالبا بيكون اصلا طين اير دراي بس بيستهبل عشان كدة افضل اننا نشتريه احسن، في مصر مش موجود غير في مكتبة بكير بسعر 21 جنية للون الواحد
اما الطين الي بينشف بالهوا فليه وصفات كتير كويسة على الانترنت لتحضيره في البيت بتطلع نتيجة عظيمة عكس البوليمر لكن هو سعره رخيص فبحس انها مش مستاهلة العناء خصوصا انه محتاج حد يظبط المقادير عشان يكون مظبوط سعر العبوة الكيلو 25 جنيه متوفر بلونين الابيض والبني وموجود في كل المكتبات الكبيرة زي سمير وعلي و الماركة ليه في مصر هي اسبانية اسمها جوفي
4. الون في اى مرحلة وايه نوع الالوان الي استخدمها؟
افضل وقت للتلوين عشان القطعة بتاعتك تاخد اللون صح هي بعد ما تنشف ممكن طبعا نلون بوهي عجينة باننا نعجن اللون معاها لكن اللون هيكون باهت و غالبا مش متوزع بالتساوي كمان
الالوان المناسبة هي الوان الاكلريك او المعروفة بالوان البلاستيك و ممكن تشتريها من اي محل بويات هتكون ارخص من المكتبة و بكمية اكبر بتكون في برطمنات بلاستيك كدة و مهم نجيب كمية كبيرة من الابيض عشان بيساعد في خلط الالوان واني اعمل لون جديد انا عايزاه
كمان الوان الازاز والسبراي باينت بيعملوا نتيجة لطيفة ولامعة اكتر من الاكلريرك و ممكن برضه بعد الاكرليك نطليها بطلاء شفاف من عند بتاع البويات برضه عشان نديها نفس اللمعان
5. ايه الي هيحصل لو حطيت الطين الي بيتصلب بالهواء في الفرن؟
ولا حاجة دي تعتبر طريقة كويسة لو مش حابب تستنى يومين عشان تنشف بس لازم نركز معاه عشان لو اتساب في الفرن كتير ممكن يتحرق او يتشقق و طبعا الميكرويف بيسخنه بسرعة جدا فبرضه هيتشقق
6. ايه المدة اللي مفروض اسيب فيها طين البوليمر في الفرن؟
يفضل نبص على عبوة البوليمر نفسها بيكون مكتوب عليها عشان ممكن كل نوع يفرق عن التاني لكن بشكل عام هو على حسب سمك الحاجة اللي هندخلها الفرن زي ما بيبئى مكتوب في معظم المارات 30 دقيقة لكل 6 ملي ممكن نقيس بالمسطرة وعلى حسب يعني لو القطعة بتاعتي 1 ملي يبقي 5 دقايق مش اتر و لو 12 ملي يبئى ساعة
مهم منسيبش الحاجة اكتر منها والا هتسود و لونها هيبوظ
7. اعمل ايه لو الطين ناشف وصعب تشكيله؟
ساعات واحنا شغالين بالطين اللي بينشف بالهوا بينشف لانه بيتعرض للهوا فيبقى ناشف كدة الاجابة هي المية المية بتدوبه خالص و كمان تخليه يلزق احسن بس منكترش في المية عشان ميدوبش خالص ولو حصل والمية كترت مننا نزود نشا و نعجنهم النشا هيمتص المية الزيادة
اما في البوليمر فبنقطعة حتت صغيرة جدا بسكينة او موس ونحط زيت جونسون للاطفال كمية قليلة و نعد نخلط لغاية ما يبقى كتلة واحدة ونكرر التقطيع لو لسة في كلاكيع
8. ايه الأدوات الي هحتاجها مع عجينة السيراميك؟
بحس الأدوات دي جزء من الجانب الابداعي في الطين يعني كل واحد بينقي ادواته من اللي بيلاقيه حواليه زي مثلا خلة السنان بتنفع اوي في حفر حاجات بخط رفيع و ممكن اسلاك النحاس لو انت ليك فيه و ممكن ادوات التشكيل بتاعة البسكوت و في ناس بتستخدم حاجات متتخيلهاش زي سرنجة مثلا لأضافة جزء صغير من العجينة او كلزق
بس ممكن نقول الاساسيات سكينة بلاستيك او عادية بس ميشترطش تكون حامية و نشابة لفرد العجينة ممكن الصغيرة خالص البلاستيك اللي بتتباع مع الصلصال وخلة سنان للتشكيل
ملحوظة هامة: أي ادوات مطبخ بنستخدمها في عجينة السيراميك لازم منستخدمهاش للأكل لأن مهما استغسلت ممكن تسرب حاجات مضرة تجيب تسمم لا قدر الله فيفضل نعمل عدة كدة للطين تبئى على جنب لوحدها
في كمان ادوات تشكيل برضه بتتباع فيى المكتبات نفس ماركة جوفي بتاعة الطين الاير دراي اللي هي جوفي بـ 14 جنيه زي دول
9. ازاي ممكن الزق شكلين في بعض؟
ساعات لما الواحد بيكون حاجة و محتاج يستغل على جزء جزء بتواجه صعوبة في انه يلزق الجزءين في بعض من غير ما يضغهم جامد فشكلهم يبوظ
السؤال هنا هل الزقهم قبل ما ينشفوا ولا بعد ما ينشفوا؟ .. مفيش اجابة محددة للسؤال ده لأنه على حسب الحالة يعني لو الشكل اللي هلزقه ده صغير حجما زي مثلا كريزة على شكل مصغر لقطعة تورته يبقي الأفضل يتلزق على الناشف بغرا ابيض بتاع النجارين او اي صمغ قوي عندنا لأن اي محاولة لضغطه هتبوظ الشكل عشان صغير أما لو جزء كبير يعني زي مثلا الميكروفون الي عملناه قبل كدة لو علي الناشف الفرق هيبان بين الشكلين و هيكون مش حلو وكمان مش هيكون ثابت لأن الصمغ ممكن ميمسكش الوزن ده في الحالة دي لازم نلزق قبل ما ننشف الشكل او نحطه في الفرن
بالنسبة للبوليمر في بوليمر سائل بيتباع عشان يلزقهم هو عبارة عن طين بوليمر برضه بس سائل او ممكن باستخدام زيت جونسون للاطفال بس ده مش دايما بينفع فالأفضل نجيب البوليمر السائل ده
اما في طين الاير دراي الموضوع بسيط جدا نبل صوابعنا بشوية مية و نبتدي نسيح سطح الجزءين في بعش عشان ميكونش في فرق
لما الشكل ينشف بالهوا او في الفرن هيكون متماسك اكتر
10. ازاي ممكن احافظ على عجينة السيراميك من انها تنشف او تكسر؟
لما نخلص شغل عليها لازم نشيل الجزء الباقي جوة العبوة بتاعتها و نقفل عليهم كيس بلاستيك و نحاول نفضيه من الهوا و نبرمه كويس او لو عندنا الكيس الي بيتقفل ده هيكون عظيم وتتشال في مكان مضلم و مش حر اوي
الكلام ده بينطبق على طين البوليمر او الاير دراي لان التنين تعرضهم للهوا يضرهم ولو ان في حالة طين البوليمر مبيبقاش مينفعش اصلاحه مادام متحطش في فرن لكن برضه لو اتحط في شمس مدة طويلة ممكن يحصله نفس تأثير الفرن و طبعا الاير دراي لو اتساب في الهوا خلاص شكرا كدة
DanglesCrafts 
[…] في التعامل مع عجينة السيراميك اللي بتتصلب بالهواء او طين الاير دراي الاكسسوارات […]
LikeLike
هو انا ممكن استخدم الوان الاكل الغذائية ولا ده هيضر العجينة ويشققها او تسيح ولا عادي ؟
LikeLike
هاللو ملك
بصي طبعا انا هفترض انك بتكلمي علي عجينة الاير دراي لان البوليمر بيبقى متلون اصلا ومينفعش تلونيه
فبالنسبة للاير دراي ممكن تستخدمي الالوان الغذائية عادب بس لو جاية في صورة جيل او زيت لكن اي الوان مائية تسيح العجينة و تشققها زي ما بتقولي وهتتضري تحطي نشا واللون يبوظ
LikeLike
مجهود عظيم .. شكرًا لك .. استفدت
وأحتاج طريقة للتواصل معك وأكون لك من الشاكرين ..
LikeLiked by 1 person
أشكرك!
للتواصل الايميل ده:
sara.mustafa.ibrahim@gmail.com
LikeLike
انا عملت العجينه ومرنه معايا بس المشكله انها لما بتتشكل بتفضل تريه مش بتجمد ايه العمل وحساها زي الصلصال
LikeLike
المفروض لو سايباها في مكان فيه تهوية كويسة حتى لو في اوضة بتجمد
ممكن في الصيف بسبب درجات الحرارة العالية مبتجمدش
جربي تحطيها في التلاجة و قوليلي ايه النتيجة
LikeLike